Gəncədə məktəb yaxınlığında iki təcili tibbi yardım avtomobili qəza törədib.
Gencexeber.az-ın məlumatına görə, Gəncə şəhərinin Nəriman Nərimanov prospektində, Məhəmməd Hadi adına 10 nömrəli tam orta məktəbin yaxınlığında gün ərzində iki yol-nəqliyyat hadisəsi baş verib.
Bu gün saat 14:00 radələrində "Mercedes" markalı təcili tibbi yardım avtomobili avtobus zolağı ilə yüksək sürətlə hərəkət edərkən, sola dönmək istəyən "Chevrolet" markalı maşınla toqquşub. Qəza nəticəsində xəsarət alan olmasa da, hər iki nəqliyyat vasitəsinə zərər dəyib.
Sözügedən hadisədən cəmi iki saat əvvəl eyni ərazidə oxşar qəza qeydə alınıb. Həmin vaxt digər bir təcili tibbi yardım avtomobili "Hyundai Azera" markalı minik maşınına çırpılıb.
Sakinlər bildirirlər ki, bu ərazidə son 15 gün ərzində 10-a yaxın yol-nəqliyyat hadisəsi baş verib. Onların fikrincə, əsas səbəblərdən biri avtobus zolağının qaydalara zidd istifadəsidir.
"Avtobus zolağı ilə həm təcili yardım, həm də digər avtomobillər sürür. Məktəbə yaxın olduğuna görə çox təhlükəlidir. Bura nəzarət kamerası quraşdırılsa, bəlkə bu qədər qəza olmaz", - sakinlərdən biri deyib.
Hadisələrlə bağlı hüquq-mühafizə orqanları araşdırma aparır.
