Qəbul imtahanlarında qanunsuz texniki vasitələrdən istifadə halları ilə bağlı cinayət işi üzrə təqsirləndirilən Kamran Əsədov və onunla birlikdə təqsirlən Gündüz Abbasovun növbəti məhkəmə prosesi başa çatıb.
Gencexeber.az-ın məlumatına görə, hakim Elçin Məmmədovun sədirliyi ilə keçirilən məhkəmə prosesində Kamran Əsədov və Gündüz Abbasov dövlət tərəfindən təqdim edilən vəkildən imtina edib və müqavilə əsasında yeni vəkillə təmin olunub. Hakimin qərarı ilə ilk olaraq dövlət ittihamçısının aktı oxunub. Məlum olub ki, Kamran Əsədov və Gündüz Abbasov 70 min manat qarşılığında 14 abituriyent üçün xüsusi texniki avadanlıqların quraşdırılmasına razılaşıblar. Bildirilib ki, pul vəsaitinin imtahan nəticələrindən sonra ödənilməsi nəzərdə tutulub.
K.Əsədov dövlət ittihamçısının irəli sürdüyü heç bir maddə ilə özünü təqsirli bilmədiyini bildirib. Gündüz Abbasov isə ancaq cinayət məcəlləsinin 302.3 (gizli informasiya əldə etmək üçün nəzrədə tutulmuş texniki vaistələrin qanunsuz satılması və ya satış məqsədi ilə əldə edilməsi) maddəsi ilə təqsirli bilib.
Daha sonra zərərçəkmiş qismində Dövlət İmtahan Mərkəzinin nümayəndəsi kimi Mirzağa Yaqubzadə hakim qarşısında çıxış edib. Növbəti proses 22 yanvar saat 15.30-a təyin edilib. Məhkəmə zalından çıxan K.Əsədov növbəti dəfə jurnalistlərin suallarını cavablandırmaq istəməyib.
