Gəncə şəhərində velosiped idmanının inkişafı istiqamətində həyata keçirilən layihələr çərçivəsində qızların və xanımların da bu idman növünə cəlb olunması üçün xüsusi imkanlar yaradılıb.
Gencexeber.az-ın məlumatına görə, Gəncədə fəaliyyət göstərən Velosiped İdman Məktəbi 11 yaşdan yuxarı bütün qızları və xanımları velosiped idmanı üzrə məşqlərə qoşulmağa çağırır. Məşqlər tam ödənişsizdir və iştirakçılar velosipedlə təmin olunurlar. Yaş məhdudiyyəti isə yoxdur.
Hazırda məşqlər AzVİF-in Gəncə şəhəri üzrə nümayəndəsi, məşqçi Mahir Məmmədov tərəfindən keçmiş "Metallurq" stadionunda keçirilir. Təşkilatçı bildirib ki, yaxın müddətdə məşqlərin Gəncə İdman Sarayında və ya Gəncə Olimpiya İdman Kompleksində təşkili planlaşdırılır.
Qeyd edək ki, proqram Azərbaycan Velosiped İdmanı Federasiyasının (AzVİF) dəstəyi ilə icra olunur. Federasiya Gəncədəki velosiped idman məktəbinə 50-dən çox velosiped təqdim edib.
Mahir Məmmədovun sözlərinə görə, velosiped idmanına dövlət dəstəyi mövcuddur və məqsəd Gəncədən də peşəkar idmançıların yetişdirilməsidir. O bildirib ki, gələcəkdə bu gənc idmançıların mötəbər yarışlarda iştirak etməsi üçün bütün zəruri şərait yaradılacaq.
Məşqlərdə iştirak etmək istəyənlər (055) 539 65 09 nömrəsi ilə əlaqə saxlaya bilərlər.
