Gəncə şəhərində ictimai qınaq doğuran xoşagəlməz hal qeydə alınıb.
Gencexeber.az-a daxil olan məlumata əsasən, "İmamzadə" Dini Kompleksinin ətrafında yerləşən qəbiristanlıqda məzarları ziyarət edən vətəndaşlar qəribə və narahatedici mənzərə ilə üzləşiblər. Qəbirlərin arasında naməlum məqsədlə yerləşdirildiyi ehtimal olunan və dini inanclara zidd hesab edilən əşyalar, cadu aşkarlanıb.
Hadisəyə şahidlik edən şəxslər bildiriblər ki, mərhumların xatirəsinə hörmətsizlik kimi qiymətləndirilən bu hal onlarda ciddi psixoloji diskomfort yaradıb. Onların fikrincə, ölülərin uyuduğu bir məkanda bu cür addımlar atmaq nə mənəvi dəyərlərlə, nə də insani davranış normaları ilə uzlaşır.
Aşkarlanmış əşyalar ərazidə xidmət göstərən şəxslərə təhvil verilib. Ziyarətçilər bu addımın kimə qarşı və hansı niyyətlə atıldığının onlara məlum olmadığını bildiriblər.
Qeyd edək ki, Gəncə şəhərində oxşar xarakterli hadisələr zaman-zaman qeydə alınsa da, bu kimi hallar hər dəfə ictimaiyyət tərəfindən kəskin etirazla qarşılanır.
