"Baş nazirdən Gəncə şəhərində yeni iş yerlərinin açılması üçün sahibkarlara əlavə imkanların yaradılmasının vacibliyini vurğulayır və dəstək göstərməyini xahiş edirəm".
Gencexeber.az məlumat verir ki, bunu Milli Məclisin Gəncdən olan deputatı Naqif Həmzəyev parlamentin bugünkü plenar iclasında deyib.
Deputat söyləyib ki, regionlarda yaşayan gənclərin Bakı şəhərinə axınının qarşısının alınması üçün də xüsusi tədbirlərin həyata keçirilməsi vacibdir:
"Bəlkə, kəndlərdən şəhərlərə köçü başa düşmək olar, amma şəhərlərdən Bakıya köç bizi düşündürməlidir".
N.Həmzəyev vurğulayıb ki, Gəncə şəhərində sərnişindaşımada ciddi irəliləyiş əldə olunub:
"Lakin şəhərdə parklanma qaydalarına nəzarətin mümkün olmaması, müasir həllərin tətbiq edilməməsi tıxac və digər problemləri ortaya çıxarıb. Bakı şəhərində olduğu kimi Gəncə şəhərində də parklanma sistemləri qurulmalıdır. Bu həm tıxac problemini həll edəcək, həmçinin vəsaitlərin dövlət büdcəsinə daxil edilməsi reallaşacaq.
Həmçinin dəmir yollarının inkişafı, xüsusilə də regionlardan sərnişin daşımanın gücləndirilməsi nəticəsində bu sahəyə tələbat artıb. Hər kəs rahat və təhlükəsiz nəqliyyat vasitəsilə səfər etmək istəyir. Bu səbəbdən Bakı-Ağstafa-Bakı istiqamətində gün ərzində həyata keçirilən reyslərin sayının yalnız bayram günlərində deyil, mütəmadi olaraq artırılmasına dəstək verilməlidir".
