Gəncənin Vaqif küçəsindəki qeyri-adi parklanma üsulu narazılıq yaradıb.
Gencexeber.az-a şikayət ünvanlayan sakinlərin iddialarına görə, ev sahibləri öz mənzillərinin qarşısına avtomobil təkərləri düzməklə küçənin müəyyən hissələrini şəxsi əraziləri kimi "qoruyurlar". Bu səbəbdən digər sürücülər, avtomobillərini saxlamaqda çətinlik çəkirlər.
Şikayətçilər bildirirlər ki, küçə ümumi istifadə üçündür və burada dayanma–durma qadağası ilə bağlı hər hansı yol nişanı yoxdur.
Buna baxmayaraq, təkərlərlə hasarlanmış sahələr sürücülərin parklanmasına mane olur.
"Hərə evinin qarşısına təkər düzür. Küçə başdan-başa "təkərlənib". Bu, şəxsi mülk deyil ki, kim istəyir, özünə yer ayırsın. Küçə daraldılıb, sanki hər kəs öz qaydasını yaradıb", - deyə şikayətçi sürücülər bildiriblər.
Şikayətçilər aidiyyəti qurumları məsələyə müdaxilə etməyə, küçədə qanunsuz şəkildə aparılan "məkan rezervasiyasına" son qoymağa çağırırlar.
