Xəbər verdiyimiz kimi, bu gün Gəncə şəhərində 2001-ci il təvəllüdlü Röyal Məmmədov bıçaqlanıb. Yaralı vəziyyətdə xəstəxanaya çatdırılan gənc həkimlərin göstərdiyi bütün tibbi müdaxilələrə baxmayaraq həyatını itirib.
Gencexeber.az-a mərhumun dayısı Bəylər Məmmədovun verdiyi məlumata görə, hadisənin başvermə səbəbi hələlik dəqiq məlum deyil.
"Çox tərbiyəli, gözəl bala idi. Taksi fəaliyyəti ilə məşğul olurdu. Onu bıçaqlayan şəxslə əvvəllər heç bir ədavəti olmayıb. Səhər saatlarında gördüm ki, sürdüyü avtomobil zədələnib. Dəqiq demək çətindir, lakin ehtimal edirəm ki, hadisəyə səbəb yüngül yol-nəqliyyat qəzası ola bilər", – deyə Bəylər Məmmədov bildirib.
Qeyd edək ki, ilkin istintaq materiallarına əsasən, cinayətin 1988-ci il təvəllüdlü Murad Hacıyev tərəfindən törədilməsinə əsaslı şübhələr müəyyən edilib. Faktla bağlı Gəncə şəhər prokurorluğunda Cinayət Məcəlləsinin qəsdən adam öldürmə maddəsi ilə cinayət işi başlanılıb. Murad Hacıyev iş üzrə şübhəli şəxs qismində saxlanılıb, ibtidai istintaq tədbirləri davam etdirilir.
Onu da qeyd edək ki, həm mərhum Röyal Məmmədov, həm də hadisəni törətməkdə şübhəli bilinən şəxs Vətən müharibəsi qazisidir.
