Gəncə Apellyasiya Məhkəməsində xuliqanlıqda təqsirləndirilən Vüsal Fərəclinin (adı, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti və zərərçəkmişin apellyasiya şikayəti üzrə məhkəmə iclası başa çatıb.
Pravda.аz xəbər verir ki, hakim Əlizamin Abdullayevin sədrliyi ilə keçirilən prosesdə qərar elan olunub.
Qərara əsasən, apellyasiya protesti və apellyasiya şikayəti təmin edilməyib.
Qeyd edək ki, istintaq orqanı tərəfindən aparılan araşdırmalar nəticəsində bir nəfərin yaxın qohumunun yas mərasimində ictimai asayişi pozması ilə bağlı cinayət işi üzrə ittiham irəli sürülüb.
İttihama görə, hadisə 31 mart 2021-ci il tarixdə, saat 13:30 radələrində Gəncə şəhərində, Vüsal Fərəclinin vəfat etmiş nənənin yas mərasimi zamanı baş verib.
Belə ki, təqsirləndirilən şəxs mərasimdə toplaşmış qohumlar qarşısında ictimai qaydanı kobud şəkildə pozaraq, cəmiyyət tərəfindən qəbul olunmuş davranış və əxlaq normalarına qarşı sayğısızlıq nümayiş etdirib, bu hərəkətləri ilə çevrəsinə açıq şəkildə hörmətsizlik ifadə edib.
Məhkəmə sənədlərinə əsasən, o, heç bir əsaslı səbəb olmadan qohumları – zərərçəkmiş B.B. və onun oğlu, zərərçəkmiş N.B. (adları və soyadları şərtidir) ilə mübahisə edib, daha sonra zor tətbiq etməklə qəsdən qərəzli hərəkətlər həyata keçirib. Mübahisə zamanı Vüsal yumruqla zərbələr vurmaqla B.B.-nin üst çənədə travmatik sınıq, dodaq nahiyəsində qansızma və şişkinliklə müşayiət olunan, sağlamlığın qısa müddətdə pozulmasına səbəb olan yüngül dərəcəli bədən xəsarətləri yetirib. Eyni zamanda, o, N.B-yə yumruqla zərbə vuraraq ona bədən xəsarəti yetirib.
Hadisədən sonra Vüsal Fərəcli saxlanılaraq cinayət məsuliyyətinə cəlb edilib.
Gəncə Şəhər Məhkəməsinin hökmü ilə təqsirləndirilən şəxs cinayətin törədilməsinə aidiyyəti olmadığından ona bəraət verilib.
Məlumat üçün bildirək ki, hadisə zamanı Vüsal Fərəcli Azərbaycanda universitetlərin birində hüquqşünaslıq ixtisası üzrə III kurs tələbəsi olub. O, ifadəsində bildirib ki, təqsirləndirilən şəxs hadisə baş verən gün onlayn qaydada keçirilən dərsdə iştirak edib.
