Təxminən üç aya yaxındır ki, 6 saylı Gəncə Neft Baza Sahəsi fəaliyyətini dayandırıb. Qurumun işləməməsi ilə bağlı müxtəlif səbəblər səsləndirilsə də, reallıq odur ki, artıq uzun müddətdir bazaya nə benzin, nə də dizel yanacağı daxil olur.
Gencexeber.az-ın məlumatına görə, sözügedən neft bazası Gəncə şəhəri və ətraf bölgələrin yanacaqla təminatında əsas mənbələrdən biri hesab olunur. Fəaliyyətin dayandırılması səbəbindən şəhər və rayonlarda fəaliyyət göstərən xırda yanacaqdolurma məntəqələri müəyyən çətinliklərlə üzləşiblər.
Bununla yanaşı, yanacaq daşıyan sürücülər və 6 saylı Baza Sahəsinin bir çox əməkdaşı hazırda işsiz qalıb. İşçi heyətinə və sürücülərə bildirilib ki, yanacağın Bakıdan gətirilməsi təmin olunmalıdır. Lakin məsafə və yüksək xərc səbəbindən bu, nə sifarişçilərə, nə də sürücülərin özlərinə sərf edir. Nəticədə iş həcmi minimuma enib.
Məsələ ilə bağlı redaksiyamızın sorğusuna cavab olaraq qurumun tabe olduğu "SOCAR PETROLEUM" QSC bildirib ki, 6 saylı Gəncə Neft Baza Sahəsində sentyabr ayından etibarən əsaslı təmir işlərinə başlanılıb və buna görə obyektin fəaliyyəti müvəqqəti olaraq dayandırılıb.
QSC-dən vurğulanıb ki, neft bazaları strateji əhəmiyyətli obyektlərdir və texniki nasazlıqların vaxtında aradan qaldırılmaması potensial qəza riskləri yarada bilər. Bu səbəbdən təmir prosesi bütün təhlükəsizlik qaydalarına və normativ tələblərə uyğun şəkildə həyata keçirilir.
Məlumata görə, təmir işləri başa çatdıqdan sonra Gəncə Neft Baza Sahəsinin fəaliyyəti tam şəkildə bərpa olunacaq.
Qurum sahibkarlardan mövcud vəziyyətə anlayış göstərmələrini xahiş edib və əlavə olaraq bildirib ki, təmir müddətində iş adamları Bakı şəhərində yerləşən 1 və 22 saylı Neft Bazalarından istifadə edə bilərlər.
