Gəncədə ağacların yandırılması və məhv edilməsi ilə bağlı ciddi iddialar səsləndirilib.
Gencexeber.az-a müraciət edən sakinlər şəhərin Sidqi Ruhulla və Həmidə Məmmədquluzadə küçələrində yaşıl zolaqlara ziyan vurulması ilə bağlı narahatlıqlarını bildiriblər.
Şikayətə əsasən, Gəncə Şəhər İcra Hakimiyyəti Mənzil Kommunal Təsərrüfatı İstehsalat Birliyinin (MKTİB) Ərazi Xidmət Sahələrinin əməkdaşları həmin ərazilərdə məişət tullantılarını, alaq otlarını və xəzəli təmizləyərkən yığıb ağacların dibində yandırıblar. Nəticədə tam sağlam və yaşıl ağacların gövdələri ciddi şəkildə yanıb, qabıq qatı zədələnib.
Bundan başqa, şəhərin Atatürk prospektində daha bir narahatedici hal qeydə alınıb. Naməlum şəxs və ya şəxslər iri ağacı qəsdən qurutmaq məqsədilə gövdəsində dəlik açaraq içinə solyarka töküblər. Hadisə ilə bağlı məlumat verən ictimai fəal Kamil Qasımov bildirib ki, ağacın gövdəsindən axan yanacağın izi və ətrafa yayılan kəskin qoxu söhbətin təsadüfi deyil, məqsədyönlü şəkildə edilən vandalizm aktı olduğunu göstərir.
Sakinlər aidiyyəti qurumlardan məsələ ilə bağlı operativ tədbirlərin görülməsini, ağaclara vurulan ziyanın qiymətləndirilməsini və bu halların təkrarlanmaması üçün nəzarət mexanizmlərinin gücləndirilməsini tələb edirlər.
