Dəfələrlə xəbər verdiyimiz kimi, Gəncə şəhərində bir zamanlar bölgənin ən böyük idman obyektlərindən hesab olunan keçmiş "Metallurq" stadionu artıq onillərdir acınacaqlı vəziyyətdədir. Onun gələcək aqibəti ilə bağlı isə indiyədək heç bir rəsmi məlumat açıqlanmayıb.
Gencexeber.az xəbər verir ki, ümumi sahəsi 6 hektar olan stadion İsaq Cəfərov və Dədə Qorqud küçələrinin kəsişməsində yerləşir. Uzun illər Gəncənin idman həyatında mühüm rol oynamış kompleks hazırda baxımsız vəziyyətdədir.
Ərazidəki idman qurğuları yararsız hala düşüb, stadionun infrastrukturu isə tamamilə köhnəlib. Bir vaxtlar yüzlərlə gəncin məşq etdiyi, yarışların keçirildiyi bu məkan indi faktiki olaraq istifadəyə yararsızdır.
Şəhər sakinləri illərlə Gəncəyə xidmət etmiş bu idman kompleksinin bərpa olunmasını və yenidən şəhərin idman həyatına qazandırılmasını tələb edirlər.
Qeyd edək ki, Gəncə şəhər Mənzil Kommunal Təsərrüfatı İstehsalat Birliyi (MKTİB) tərəfindən stadion ərazisində mütəmadi olaraq genişmiqyaslı təmizlik işləri aparılır və ərazinin tamamilə xarabalığa çevrilməsinin qarşısı alınır. Lakin görülən işlər yalnız sanitariya xarakteri daşıyır və kompleksin əsaslı şəkildə bərpası ilə bağlı addımlar müşahidə olunmur.
Hazırda "Metallurq" stadionunun gələcək taleyi ilə bağlı məlumat yoxdur.
Məlumat üçün bildirək ki, şəhərdə yerləşən digər iri idman obyekti – Gəncə şəhər stadionu da uzun illər əsaslı təmirə ehtiyac duyurdu. 15 464 tamaşaçı tutumuna malik olan stadion yenidən inşa edilərək III MDB Oyunlarının açılış mərasiminə hazır vəziyyətə gətirilib və təyinatı üzrə istifadə olunub. Hazırda arenada ot örtüyünün qurulması prosesi aparılır və yaxın vaxtlarda Gəncənin "Kəpəz" futbol komandası ev oyunlarını burada keçirəcək.
