Gəncədə Xalq artisti Mənsum İbrahimovun 65 illik yubileyi münasibətilə yaradıcılıq gecəsi keçirilib.
Gencexeber.az-a Gəncə Şəhər İcra Hakimiyyətindən bildirilib ki, qurumun dəstəyi, Gəncə-Daşkəsən Regional Mədəniyyət İdarəsinin və Fikrət Əmirov adına Gəncə Dövlət Filarmoniyasının təşkilatçılığı ilə Xalq artisti, "Şöhrət" və "Şərəf" ordenli, Azərbaycan Milli Konservatoriyasının professoru Mənsum İbrahimovun 65 illik yubileyinə həsr olunmuş yaradıcılıq gecəsi keçirilib.
Tədbirdə Gəncə Şəhər İcra Hakimiyyətinin başçısı Niyazi Bayramov, Gürcüstanın Gəncədəki baş konsulu Kaxaber Abdaladze, Türkiyənin Gəncədəki vitse-konsulu Yığıt Yalın Solan, Apellyasiya Məhkəməsinin sədri Toğrul Əli, YAP Gəncə şəhər təşkilatının sədri Bayram Aslanov, Gəncə şəhər prokuroru Rauf Gözəlov, Gəncə Gömrük İdarəsinin rəisi Şamil Həsənli, "Rövşən Oğuz Qrup" MMC-nin direktoru Hafiz Mustafayev, şəhər icra hakimiyyətinin aparat əməkdaşları, idarə, müəssisə və təşkilat rəhbərləri, şəhid ailələri, müharibə veteranları və şəhər sakinləri iştirak ediblər.
Əvvəlcə tanınmış xanəndənin həyat və yaradıcılığına həsr olunmuş videoçarx nümayiş olunub.
F.Əmirov adına Gəncə Dövlət Filarmoniyasının direktoru, Xalq artisti Aygün Səmədzadə və Əməkdar incəsənət xadimi Hafiz Quliyev çıxış edərək Mənsum İbrahimovun sənət yolundan danışıblar və onu yubiley münasibətilə təbrik ediblər.
Konsert proqramında Xalq artisti, tarzən Elçin Həşimovun və kamança ustası, Əməkdar artist Elnur Əhmədovun müşayiəti ilə Əməkdar artistlər Təyyar Bayramov və Babək Niftəliyev, Əməkdar mədəniyyət işçisi Aşıq Ədalət Dəlidağlı, eləcə də solistlər Gülzar Fərəcova, Sədəf Budaqova, Ayşən Mehdiyeva və Pərvaz İbrahimli, o cümlədən Gəncə Dövlət Universitetinin tələbə xor kollektivi yubilyarın repertuarından muğamları, xalq və bəstəkar mahnılarını ifa ediblər.
Gecənin sonunda Mənsum İbrahimov tədbirin təşkilinə göstərilən dəstəyə görə minnətdarlığını bildirib.
Konsert proqramı tamaşaçılar tərəfindən böyük rəğbətlə qarşılanıb.
