Xəbər verdiyimiz kimi, Gəncə şəhərinin Sürəyya Qacar küçəsində (keçmiş Pavlov küçəsi) kişi qonşusuna məxsus "Chevrolet Cruze" markalı avtomobilə qəsdən ziyan vurub.
Məsələ ilə bağlı Gencexeber.az-a açıqlama verən Daxili İşlər Nazirliyinin (DİN) Mətbuat Xidmətinin regional qrupunun baş inspektoru Eşqin Qasımov bildirib ki, yanvarın 24-də Gəncə şəhər sakini Gəncə Şəhər Baş Polis İdarəsinə müraciət edərək, gecə saatlarında naməlum şəxs tərəfindən ona məxsus avtomobilin şüşəsinin sındırılması nəticəsində maddi ziyan vurulduğunu bildirib.
"Daxil olmuş müraciət əsasında polis əməkdaşları tərəfindən keçirilən müvafiq tədbirlər nəticəsində hadisəni törətməkdə şübhəli bilinən şəxsin Gəncə şəhər sakini, ruhi-əsəb dispanserində qeydiyyatda olan 37 yaşlı Elnur Axundov olması müəyyən edilib.
Şübhəli şəxs polis əməkdaşları tərəfindən saxlanılaraq müvafiq dispanserə yerləşdirilib. Faktla bağlı ekspertiza təyin olunub, araşdırmalar davam etdirilir", – Eşqin Qasımov əlavə edib.
Qeyd edək ki, adı çəkilən şəxsin psixoloji vəziyyəti uzun müddətdir ki, qənaətbəxş deyil. Son 7 il ərzində o, dəfələrlə törətdiyi əməllərə görə hüquq-mühafizə orqanları tərəfindən psixoloji dispanserlərə göndərilib. Lakin müayinələr zamanı psixoloji durumu yerində hesab edildiyindən azadlığa buraxılıb.
Küçə sakinlərinin sözlərinə görə, E.Axundov mütəmadi oğurluq da edir. Bildirilir ki, ailə üzvləri onunla bir evdə yaşamaqdan imtina edərək başqa ünvana köçüblər.
