Gəncədə Fikrət Əmirov parkı ərazisində sürü halında dolaşan sahibsiz itlər şəhər sakininə hücum edib.
Gencexeber.az-ın məlumatına görə, yolu keçməyə hazırlaşan şəxs qəflətən sürüdən ayrılan iki itin hücumuna məruz qalıb. Hadisə ani baş verdiyindən zərərçəkən tarazlığını itirərək yerə yıxılıb və yüngül xəsarətlər alıb. Yerdə uzanan şəxsi bir neçə dəfə dişləməyə cəhd edən heyvanlar ərazidə olan bir kişinin müdaxiləsi nəticəsində uzaqlaşdırılıb.
Zərərçəkən şəxs axsayaraq yolu keçə bilib və hadisə şahidlərinin köməyi ilə evə aparılıb.
Qeyd edək ki, Gəncədə hər ay sahibsiz itlərin hücumu ilə bağlı 100-ə yaxın hadisə baş verir. Şəhərdə 2023-cü ildə yaradılan "Yuva" heyvan sığınacağı ötən ilin yanvar ayında maddi çatışmazlıqlar səbəbindən fəaliyyətini dayandırıb. Sığınacaqda saxlanılan itlər isə şəhər ərazisinə buraxılıb.
Hazırda Gəncədə sahibsiz heyvan problemi aktuallığını qoruyur. Redaksiyamıza bu məsələ ilə bağlı demək olar ki, hər gün onlarla şikayət daxil olur.
