Gəncə dəmiryol vağzalında havaya zərərli maddələrin buraxılması ilə bağlı monitorinqlər keçirilib.
Gencexeber.az-a məsələ ilə bağlı açıqlama verən ictimai fəal Kamil Qasımovun sözlərinə görə, vağzal ərazisində istismar olunan daxili yanma mühərrikli köhnə lokomotivlər tərəfindən havaya intensiv şəkildə tüstü buraxılır. Bu hal ərazidə havanın çirklənməsi ilə bağlı əsaslı şübhələrin yaranmasına səbəb olub.
Bununla əlaqədar vətəndaş Ekologiya və Təbii Sərvətlər Nazirliyinə müraciət edərək araşdırma aparılmasını tələb edib. Nazirliyin əməkdaşları müraciətə operativ reaksiya verərək əraziyə baxış keçiriblər və aparılan monitorinqlər zamanı havaya zərərli maddələrin buraxılması faktı təsdiqlənib.
"Aparılmış baxış zamanı müəyyən edilib ki, Gəncə şəhəri, Dəmir yolu vağzalından qatarların keçidi yalnız əvvəlcədən müəyyən edilmiş vaxtlarda həyata keçirilir.
Monitorinq zamanı atmosfer havasına atılan zərərli qaz qarışıqlarının miqdarını müəyyən etmək məqsədilə ətraf ərazidə "SKY 2000-R5" səyyar cihazı vasitəsilə ölçmə-analiz işləri aparılıb.
Nəticəyə əsasən, dəm qazı (CO) – 2,6 mq/m³ (norma 5 mq/m³) təşkil edərək, ətraf mühit üçün yol verilən norma daxilində olduğu müəyyən edilib" – Ekologiya və Təbii Sərvətlər Nazirliyindən bildirilib.
