Gəncə şəhərində baş verən hadisə sakinlər arasında ciddi narahatlıq və hiddət doğurub.
Gencexeber.az-ın məlumatına görə, Bağman ərazisində yerləşən qəbiristanlıqlardan birində mərhumlarının məzarını ziyarət edən şəhər sakinləri gözləmədikləri mənzərə ilə qarşılaşıblar.
Məzarlıqların arasında naməlum şəxsə aid olduğu ehtimal edilən cadu tapılıb. Ziyarətçilərin sözlərinə görə, bu hal onları həm sarsıdıb, həm də dərin narahatlıq içində qoyub. Mərhumların uyuduğu məkanda bu cür əməllərin törədilməsi insanlarda qəzəb və ikrah hissi yaradıb.
Tapılan cadu dərhal qəbiristanlıqda fəaliyyət göstərən mollalara təhvil verilib. Ziyarətçilər cadunun kimə qarşı edildiyini bilmədiklərini bildiriblər. Onların sözlərinə görə, bu cür hərəkətlər nə insanlığa, nə də dini dəyərlərə sığır.
Sakinlər bildiriblər ki, ölülərin uyuduğu, duaların oxunduğu bir məkanda belə iyrənc əməllərə əl atılması cəmiyyət üçün təhlükəli siqnaldır. Onlar aidiyyəti qurumları bu məsələyə biganə qalmamağa, qəbiristanlıqlara nəzarətin gücləndirilməsinə çağırıblar.
