Gəncədə yeni məktəb direktoru təyin olunub.
Gencexeber.az-ın məlumatına görə, Gəncə-Daşkəsən Regional Təhsil İdarəsinin tabeliyində olan məktəbə yeni direktor təyin edilib. Belə ki, Gəncə şəhər İnteqrasiya təlimli internat tipli gimnaziyanın direktoru vəzifəsini Nail İmranov icra edəcək.
Qeyd edək ki, Nail Bahadur oğlu İmranov 21 sentyabr 1989-cu ildə Kəlbəcər rayonunun Zülfüqarlı kəndində dünyaya gəlib. Gəncə Dövlət Universitetinin Riyaziyyat və İnformatika ixtisası üzrə bakalavr təhsilini başa vurub. Daha sonra Azərbaycan Dövlət Aqrar Universitetinin Menecment (Alman proqramı) ixtisası üzrə magistratura pilləsində təhsil alıb.
2012-2019-cu illərdə müxtəlif özəl müəssisələrdə riyaziyyat və informatika müəllimi, eyni zamanda icraçı direktor kimi fəaliyyət göstərib. 2014-2017-ci illərdə Samux rayon Qıyaslı kənd tam orta məktəbində informatika müəllimi, 2017-2020-ci illərdə Gəncə şəhəri 7 nömrəli tam orta məktəbdə riyaziyyat müəllimi kimi çalışıb.
2020-2021-ci illərdə Gəncə şəhəri 37 nömrəli tam orta məktəbdə direktor vəzifəsində işləyib. 2021-ci ildən etibarən həmin məktəbdə riyaziyyat müəllimi kimi fəaliyyətini davam etdirib.
2018-2021-ci illərdə Təhsildə İnnovativ Texnologiyalar (İTE) Azərbaycan təşkilatının təlimçisi, təhsil meneceri və müasir metodist kimi də çalışaraq təhsil sahəsində bacarıq və təcrübəsini daha da artırıb.
