Gəncə Dövlət Universitetinin (GDU) Azərbaycan və dünya ədəbiyyatı kafedrasının dosenti, filologiya üzrə fəlsəfə doktoru Qivami Qazıyev vəfat edib.
Gencexeber.az-ın məlumatına görə, səhhətində yaranmış problemlər səbəbindən müalicə alan alim, tibbi müdaxilələrə baxmayaraq dünyasını dəyişib.
Qeyd edək ki, Qivami Qazıyev 11 avqust 1956-cı ildə Goranboy rayonunun Dəliməmmədli qəsəbəsində anadan olub. 1978-ci ildə H.Zərdabi adına KDPİ-ni (indiki Gəncə Dövlət Universiteti) Azərbaycan dili və ədəbiyyatı ixtisası üzrə bitirib, əmək fəaliyyətinə Bərdə rayonunun Yeni Əyricə kənd orta məktəbində müəllim kimi başlayıb.
O, 2011-ci ildə filologiya üzrə fəlsəfə doktoru elmi dərəcəsi, 2018-ci ildə isə dosent elmi adını alıb.
Alim 2015-ci ildən Azərbaycan Yazıçılar Birliyinin üzvü, 2019-cu ildən isə Azərbaycan Respublikası Prezidentinin fərdi təqaüdçüsü idi.
Müasir Azərbaycan ədəbiyyatı üzrə tədqiqatçı kimi tanınan Qivami Qazıyev "Gəncə ədəbi mühiti (1900–1930-cu illər)" monoqrafiyasının, Mir Cəlal Paşayevə həsr olunmuş dərs vəsaitinin, müxtəlif fənn proqramlarının və 20-dən çox elmi məqalənin müəllifi olub.
Allah rəhmət eləsin.
