Azərbaycan Respublikasının Prezidenti, Yeni Azərbaycan Partiyasının Sədri, Müzəffər Ali Baş Komandan cənab İlham Əliyevin 64 yaşının tamam olması münasibətilə Gəncə şəhərində genişmiqyaslı və ictimai-siyasi əhəmiyyət daşıyan flashmob təşkil edilib.
Gencexeber.az məlumat verir ki, Yeni Azərbaycan Partiyası Mərkəzi Aparatının təşəbbüsü, Gəncə şəhər İcra Hakimiyyətinin və Yeni Azərbaycan Partiyası Gəncə şəhər təşkilatının birgə təşkilatçılığı ilə Gəncə şəhər meydanında keçirilən "Dəmir yumruq və Sülh" adlı flashmobda tələbə gənclərdən ibarət 10.000 nəfərdən çox iştirakçı yer alıb.
Tədbirin əsas məqsədi Azərbaycanın güc, birlik və qətiyyət rəmzi olan "Dəmir yumruq" ideyasının dünyaya sülh, sabitlik və əməkdaşlıq mesajı ilə vəhdətdə təqdim olunmasını nümayiş etdirmək olub. Flashmob vasitəsilə ölkəmizin sülhpərvər siyasəti, güclü dövlət mövqeyi və beynəlxalq sülh təşəbbüslərinə verdiyi töhfə simvolik formada ictimaiyyətə çatdırılıb.
Gənclərin fəal iştirakı ilə reallaşdırılan bu kütləvi aksiya dövlət başçısının ətrafında sıx birliyin, milli həmrəyliyin və Azərbaycan gəncliyinin dövlətçilik dəyərlərinə sədaqətinin bariz nümunəsi kimi qiymətləndirilib.
"Dəmir yumruq və Sülh" adlı flashmob miqyası, ideya məzmunu və verdiyi ictimai mesaj baxımından Gəncə şəhərinin ictimai həyatında əlamətdar hadisə olmaqla yanaşı, Azərbaycanın güclü və eyni zamanda sülhə çağıran dövlət imicini bir daha nümayiş etdirib.
