Avtozavod qəsəbəsində yerləşən Gəncə şəhər Aşıq Ələsgər adına 36 nömrəli tam orta məktəbin təmirə ehtiyacı var.
Valideynlərdən biri Gencexeber.az-a ünvanladığı şikayətində bildirib ki, məktəbin ümumi durumu təhsilin normal təşkili üçün yararlı deyil. Onun sözlərinə görə, binanın fasadındakı köhnə boya artıq böyük hissələrlə tökülür. Sinif otaqlarında partaların və oturacaqların bir qismi istifadə edilə bilməyəcək dərəcədə sıradan çıxıb. Bəzi otaqlarda asma tavanlar çöküb, divarlarda iri çatlar əmələ gəlib.
Ən ciddi narazılıq isə məktəbin sanitar qovşağının vəziyyəti ilə bağlıdır. Şikayətçi bildirir ki, ayaqyolu tamamilə yararsız vəziyyətdədir və istifadə üçün əlverişli deyil.
Valideyn aidiyyəti qurumları vəziyyətə təcili müdaxilə etməyə çağırıb və şagirdlər üçün daha təhlükəsiz və sağlam tədris şəraitinin təmin edilməsini istəyib.
