Gəncə şəhərində 7 saylı körpələr evi - uşaq bağçasının uzun müddətdir istifadəyə verilməməsi valideynlər arasında ciddi narazılığa səbəb olub.
Məsələ ilə bağlı Gencexeber.az-a şikayət ünvanlayan valideynlərin sözlərinə görə, bağça 4 ildir ki, təmir prosesindədir və hələ də fəaliyyətini bərpa etməyib.
Hazırda müəssisə Gəncə şəhər 46 saylı körpələr evi - uşaq bağçasının nəzdində fəaliyyət göstərir.
Valideynlər bildirirlər ki, bu vəziyyət uşaqların yerləşdirilməsində sıxlığa, çatışmazlıqlara gətirib çıxarır.
Qeyd edək ki, bağçanın təmiri Şəhərsalma və Arxitektura Komitəsi tərəfindən həyata keçirilir. Lakin işlərin nə zaman tamamlanacağı ilə bağlı valideynlərə konkret məlumat verilməyib.
Valideynlər bağçanın ən qısa zamanda istifadəyə verilməsini tələb edirlər.
