Gəncə şəhəri 46 saylı körpələr evi–uşaq bağçasında təhlükəli vəziyyət yaranıb. Bağçanın həyətində yerləşən qaz borusu təxminən bir il əvvəl güclü külək nəticəsində yerindən qoparaq aşıb və hazırda daxili yolu tamamilə kəsmiş vəziyyətdədir.
Bu barədə Gencexeber.az-a valideynlər və bağça kollektivi tərəfindən məlumat verilib.
Bildirilib ki, borunun bu vəziyyətdə qalması həm uşaqlar, həm də müəssisənin əməkdaşları üçün ciddi təhlükə yaradır. Körpələrin həyətə çıxışı və gündəlik hərəkəti çətinləşib.
Bağçanın rəhbərliyi məsələ ilə bağlı dəfələrlə aidiyyəti qurumlara, o cümlədən "Azəriqaz" ASC-yə müraciət edib. Lakin redaksiyamıza verilən məlumata görə, ötən müddət ərzində problem aradan qaldırılmayıb.
Məlumata əsasən, "Azəriqaz" ASC-dən bağça rəhbərliyinə bildirilib ki, təmir işləri üçün borunun alınması və bərpa işlərinin təşkili müəssisənin öz hesabına həyata keçirilməlidir.
"Biz dövlət bağçasıyıq. Qorxuruq ki, bu vəziyyət uşaqlar üçün fəlakətlə nəticələnə bilər. Dövlət müəssisəsində təhlükəli borunu niyə müdiriyyət öz hesabına düzəltməlidir ki?" – deyə bağça əməkdaşlarından biri bildirib.
Hazırda 46 saylı körpələr evində boru həm təhlükə mənbəyi olaraq qalır, həm də bağçanın normal fəaliyyətinə mane olur. Valideynlər və kollektiv məsul qurumlardan problemin təcili həllini tələb edirlər.
