Gəncə şəhəri, Poçt qəsəbəsi, Azərbaycan Əsgəri küçəsində yerləşən avtobus dayanacağında qoyulan məişət tullantıları konteyneri ilə bağlı məsələ aydınlaşdırılıb.
Gencexeber.az-a Mənzil Kommunal Təsərrüfatı İstehsalat Birliyindən verilən açıqlamaya görə, sözügedən zibil konteynerinin quruma heç bir aidiyyəti yoxdur. Bildirilib ki, konteyner ərazidə fəaliyyət göstərən ticarət obyektinin sahibi tərəfindən yerləşdirilib.
Qeyd olunub ki, buna baxmayaraq, vətəndaşların rahatlığını və avtobus dayanacağından normal istifadəni təmin etmək məqsədilə konteynerin yeri qurumun əməkdaşları tərəfindən dəyişdirilib. Belə ki, konteyner dayanacaqdan bir qədər aralı məsafəyə köçürülüb.
Məsələ ilə bağlı sakinlər bildiriblər ki, konteynerin dayanacaq ərazisindən uzaqlaşdırılması həm sanitariya baxımından, həm də ictimai nəqliyyatdan istifadə edən vətəndaşların rahatlığı üçün daha məqsədəuyğundur.
