Gəncənin Gülüstan qəsəbəsində yerləşən "Böyük Ucuzluq" geyim mağazasında oğurluq hadisəsi baş verib.
Gencexeber.az-ın məlumatına görə, şəhər sakininin kassada ödəmə zamanı 20 manatlıq əsginası naməlum qadın tərəfindən götürülüb. Zərərçəkən iddia edir ki, seçdiyi geyimlərin ödənişini etməzdən əvvəl pulu kassirin qarşısına qoyub. Bu zaman növbədə dayanan yaşlı qadın fürsətdən istifadə edərək 20 manatı masanın üzərindən götürüb və aldığı məhsulların ödənişində istifadə edib.
Hadisə mağazanın müşahidə kameralarına düşüb. Kadrlardan göründüyü kimi, ağbirçək qadın pulu götürməmişdən əvvəl diqqətlə ətrafı və zərərçəkənin hərəkətlərini izləyir, uyğun anı gözləyir və daha sonra əsginası öz pullarına qataraq paltarların ödənişini edir.
Şikayətçi əlavə edib ki, o, kassanın qarşısında bacısının gəlməsini gözlədiyi üçün bir müddətlik diqqəti yayınaraq ətrafa baxıb. Vətəndaşların iddiasına görə, mağazanı tərk edən ağbirçək BMW markalı avtomobilə minərək ərazidən uzaqlaşıb.
