Gəncənin Cavad bəy Rəfibəyli küçəsində bordür yenilənməsi suallar doğurub.
Gencexeber.az-a daxil olan məlumatlara görə, Cavad bəy Rəfibəyli küçəsində bordürlərin dəyişdirilməsi prosesi zamanı ciddi nöqsanlara yol verilib.
Belə ki, ərazidə mövcud olan köhnə yolayırıcılardan heç biri çıxarılmayıb. Onların sökülməsi və yerinə yeni bordürlərin düzülməsi əvəzinə, köhnə bordürlərin qarşısında asfalt müəyyən məsafədə dağıdılıb və yeni bordürlərin döşənməsinə başlanılıb. Bu səbəbdən piyada zolağı ilə avtomobil yolu arasında normal keçid əvəzinə, ikiqat — həm köhnə, həm də yeni bordür sırası yaranıb.
Sakinlər bildirirlər ki, bu vəziyyət həm şəhər estetikası baxımından, həm də piyadaların təhlükəsizliyi üçün ciddi narahatlıq yaradır.
Sözügedən işləri həyata keçirən "28 nömrəli Yol İstismarı" MMC-nin bu üsulu hansı səbəbdən seçdiyi isə hələlik məlum deyil.
