Gəncə şəhəri Atatürk prospektində yerləşən binaların arxa hissəsində aparılan abadlıq işləri yarımçıq vəziyyətdə qalıb.
Gencexeber.az-ın məlumatına görə, ərazidə piyada səkisi ilə binaların arxa hissəsini ayırmaq məqsədilə kiçik hasar inşa edilib və onun üzərinə skamyalar inteqrasiya olunub. Lakin işlər tam yekunlaşdırılmadan dayandırılıb. Hazırda ərazidə tikinti tullantıları və yarımçıq qalan iş izləri qalmaqdadır.
Sakinlərin sözlərinə görə, bir müddət öncə işlər sürətlə aparılırdı, lakin sonradan səbəbsiz olaraq dayandırılıb. Ərazidə çalışan ustalar isə iddia ediblər ki, əməkhaqlarını ala bilmədiklərinə görə işlərini davam etdirməyiblər.
Hazırda ərazi baxımsız vəziyyətdədir və sakinlər müvafiq qurumlardan abadlıq işlərinin bərpasını tələb edirlər.
