Müxtəlif media resurslar tərəfindən Gəncə şəhəri ərazisində ahıl qadının avtobus tərəfindən vurulması ilə bağlı yayılan xəbərlər həqiqəti əks etdirmir.
Gencexeber.az-ın məlumatına görə, 1947-ci il təvəllüdlü şəhər sakini M.Nəsrullayeva "BakuBus" MMC-yə məxsus 4 saylı marşrut xətti üzrə hərəkət edən sərnişin avtobusuna minərkən yıxılıb.
Gəncə Şəhər Birləşmiş Xəstəxanasından redaksiyamıza verilən məlumata görə, qadın Akademik Zülfüqar Məmmədov adına xəstəxananın Təcili tibbi yardım şöbəsinə hospitalizasiya olunub.
"Hər iki biləyin və sağ diz oynağının sıyrılmış-cızılmış yarası diaqnozu təyin edilən pasiyentə zəruri tibbi xidmətlər göstərilib. Vəziyyəti qənaətbəxş qiymətləndirilən şəxs ambulator müalicə üçün evə buraxılıb", – məlumatda qeyd olunub.
Hadisənin necə baş verdiyini dəqiqləşdirmək məqsədilə redaksiyamız "BakuBus" MMC ilə əlaqə saxlayıb. Sərnişindaşıma şirkətindən bildirilib ki, video müşahidə kameralarından aparılan araşdırmanın nəticəsinə əsasən məlum olub ki, hadisə saat 14:00 radələrində Heydər Əliyev prospekti 696 ünvanında yerləşən dayanacaqda baş verib:
"Avtobus dayanacaqda dayandığı zaman sərnişin avtobusdan düşür. Daha sonra sürücü hərəkətinə davam etmək məqsədilə qapıları bağlayarkən sərnişin anidən orta qapıdan avtobusa geri qayıtmağa cəhd edir. Bu da, qaydalara ziddir. Avtobusdan düşdükdən sonra yalnız ön qapıdan daxil olmaq mümkündür. Qapıların bağlanması zamanı sərnişin qapı arasında qalaraq təhlükəli vəziyyət yaranıb.
Hadisəni görən sürücü dərhal sərnişinə yaxınlaşaraq ona lazımi köməyi göstərib, daha sonra sərnişin vəziyyətinin normal olduğu təsdiqləndən sonra növbəti dayanacaqda təhlükəsiz şəkildə avtobusu tərk edib.
Araşdırma göstərir ki, hadisənin baş verməsində sürücünün hər hansı məsuliyyəti yoxdur".
"BakuBus" MMC sərnişinləri mənzil başına təhlükəsiz çatdıran sürücülərə qarşı daha anlayışlı olmağa, ictimai nəqliyyatdan istifadə edərkən qaydalara riayət etməyə və ictimai nəqliyyata olan etimadı qorumağa çağırıb.
