Gəncədə 11 çoxmənzilli binanı əhatə edən həşərat problemi sakinlərin narazılığına səbəb olub.
Gencexeber.az-a ünvanlanan çoxsaylı şikayətlərə görə, Gəncə şəhərinin Nəriman Nərimanov və Nizami Gəncəvi prospektlərinin, eləcə də Dədə Qorqud küçəsinin kəsişməsində yerləşən 11 çoxmənzilli binanın sakinləri həşəratlara görə əziyyət çəkirlər.
Bildirilib ki, xüsusilə bit və birə ilə bağlı problem kritik həddə çatıb. Həşəratlar tikililərin həyətində gəzintiyə çıxan vətəndaşların paltarlarına yapışır və bu yolla mənzillərə daxil olurlar. Nəticədə həm uşaqlar, həm də böyüklər həşəratların yaratdığı qaşınmadan əziyyət çəkirlər.
Sakinlər bu barədə şikayət etdiklərini, məsələ ilə bağlı yalnız bir dəfə dezinseksiya işlərinin aparıldığını bildiriblər. Lakin onların sözlərinə görə, problem həll edilməyib.
Sakinlər aidiyyəti qurumlardan sözügedən ərazidə yerləşən bütün çoxmənzilli binalarda kompleks şəkildə dezinfeksiya və dezinseksiya işlərinin aparılmasını, zərurət yaranarsa, dərmanlamanın təkrar həyata keçirilməsini xahiş edirlər.
