14-16 noyabr tarixlərində Gəncə İdman Sarayında aerobika gimnastikası üzrə böyüklər arasında 14-cü Avropa çempionatı keçirilir.
Gencexeber.az bildirir ki, bu mötəbər yarış Gəncənin idman ənənələrinin və beynəlxalq tədbirlərin təşkilindəki yüksək potensialının növbəti təsdiqi hesab olunur.
Bildirilib ki, yarışda 18 ölkədən 151 gimnast iştirak edir. İştirak edən idmançılar fərdi, üçlük, qrup, qarışıq cütlük və aerodans proqramlarında öz məharətlərini nümayiş etdirirlər.
Yarışın açılış mərasimi xüsusi təntənə ilə keçib. Səhnəyə əvvəlcə iştirakçı ölkələrin bayraqları gətirilib, daha sonra Gəncə şəhər İcra Hakimiyyətinin başçısı Niyazi Bayramov və Avropa Gimnastikasının vitse-prezidenti Edvard Kolar çıxış edərək yarışın əhəmiyyətindən, Gəncənin idman dünyasında artan rolundan və bu cür tədbirlərin beynəlxalq əməkdaşlığa verdiyi töhfələrdən danışıblar.
Daha sonra gimnastların ilk çıxışlarına start verilib. Onlar fərdi proqram üzrə öz peşəkarlıqlarını, fiziki hazırlıqlarını və artistik bacarıqlarını nümayiş etdiriblər.
Qeyd edək ki, qitə birinciliyinə 16 noyabr tarixində yekun vurulacaq.
Xatırladaq ki, Gəncə İdman Sarayında 9-11 noyabr tarixlərində aerobika gimnastikası üzrə yeniyetmələr və 15 yaşadək idmançılar arasında çempionatlar keçirilib.
