Əmək və Əhalinin Sosial Müdafiəsi Nazirliyinin həyata keçirdiyi sosial layihə çərçivəsində kvadratmetri bazar dəyərindən əhəmiyyətli dərəcədə aşağı olan yeni mənzillər satışa çıxarılıb.
Oxu.аz xəbər verir ki, mənzillərin bir kvadratmetrinin qiyməti 435 manatdan başlayır.
Mənzillər Samux rayonunun Seyidlər kəndinin yaxınlığında, Gəncə şəhərindən təxminən 15 kilometr məsafədə yerləşən yeni yaşayış kompleksində təklif olunur.
Çıxarışla təqdim edilən mənzillər 3 və 4 otaqdan ibarətdir, tam təmirli vəziyyətdədir və əvvəllər istifadə olunmayıb.
Mənzillər barədə ətraflı məlumat ms.sosial.gov.az portalında yerləşdirilib. Mənzili həmin portal vasitəsilə "Bron et" düyməsinə basmaqla rezerv etmək mümkündür. Hər bir mənzili maksimum üç nəfər bron edə bilər. İlk bron edən şəxs mənzili almaqdan imtina edərsə, alış hüququ növbə ilə digər bron etmiş şəxsə ötürülür. Nazirliklə mənzili bron edərək satın alan şəxs arasında 10 gün ərzində alqı-satqı müqaviləsi rəsmiləşdirilir.
Qeyd edək ki, kompleks doqquz dördmərtəbəli, iki bloklu binadan ibarətdir. Hər mərtəbədə 2 və ya 3 mənzil yerləşir.
Mənzillərin sahəsi:
– 2 otaqlı: 62,8 - 70,3 m²;
– 3 otaqlı: 79,8 - 80,5 m²;
– 4 otaqlı: 100,5 m².
Müqayisə üçün qeyd edək ki, Gəncə şəhərində yeni tikililərdə təmirli mənzillərin kv.m-i 1400 manatdan başlayır.
