Gəncə şəhər sakini Seymur Yusifov təxminən üç ilə yaxındır inşa etdirdiyi tikilisinə rəsmi sənəd ala bilmədiyini bildirir.
Gencexeber.az-a məsələ ilə bağlı şikayətini söyləyən S.Yusifovun sözlərinə görə, bütün aidiyyəti dövlət qurumlarından müsbət rəy alsa da, Əmlak Məsələləri üzrə Dövlət Komitəsi sənədləşdirməyə icazə vermir.
O iddia edir ki, qurumda sənədlərə baxan bəzi əməkdaşlar onu süründürməçiliklə üzləşdirirlər. Bildirilib ki, ilkin mərhələdə yalnız "Azərişıq" ASC tərəfindən obyektə mənfi rəy verilib. Daha sonra qurumun nümayəndələri ərazidə yenidən baxış keçirib və mənfi rəy tamamilə ləğv edilərək müsbət rəy ilə əvəzlənib. Bununla da sənədləşmə üçün nəzərdə tutulan bütün tələblər yerinə yetirilib.
Lakin Əmlak Məsələləri üzrə Dövlət Komitəsinin Gəncə şəhər şöbəsindən bildirilib ki, ilk verilən mənfi rəy silinməlidir. Seymur Yusifov isə vurğulayır ki, qanunvericiliyə görə, ikinci dəfə verilən müsbət rəy əvvəlkini avtomatik olaraq qüvvədən salır, lakin Komitə bu faktı qəbul etmir.
Seymur Yusifov problemin həlli üçün Bakıda adıçəkilən qurumun özünə dəfələrlə müraciət edib. Lakin onun iddiasına görə, şikayətinə baxılmayıb, rəsmi şəxslərin qəbuluna düşməsinə isə müxtəlif bəhanələrlə icazə verilməyib.
Şikayətçi əlavə edir ki, qurum ona göstərilən səbəbləri rəsmi şəkildə təqdim etmir. Bu isə vətəndaşı məhkəməyə müraciət etmək hüququndan faktiki olaraq məhrum edir. Çünki məhkəməyə müraciət üçün komitənin rəsmi cavab məktubu tələb olunur, lakin illərdir bu cavab ona təqdim edilmir.
Seymur Yusifov bildirir ki, sənədləşdirmə prosesi əsassız şəkildə yubadılır və heç bir izahedici sənəd təqdim olunmadığından o, hüquqi yolla da problemini həll edə bilmir.
