Təxminən 8 il öncə Gəncə Dövlət Filarmoniyası şəhər sakinlərinin və qonaqların istifadəsinə verilmişdi. Böyük maliyyə hesabına tikilən bu mədəniyyət kompleksi həm Gəncənin, həm də ölkənin qərb bölgəsinin ən möhtəşəm mədəni ocaqlarından biri hesab olunurdu. Lakin görünür, bu sevinc uzun çəkməyəcək.
Gencexeber.az-ın məlumatına görə, Mədəniyyət Nazirliyinin tabeliyində olan Fikrət Əmirov adına Gəncə Dövlət Filarmoniyasının binasında dərin çatlar əmələ gəlib. Binanın bünövrəsində və xüsusilə arxa hissəsində çökmə halları müşahidə olunur. Eyni zamanda, filarmoniyaya bitişik və sərgilərin keçirildiyi "Urban" Mərkəzinin daxilində və fasadında da oxşar vəziyyət müşahidə edilir.
Binada yaranan bu problemlər sakinlərin ciddi narahatlığına səbəb olub. Onların sözlərinə görə, bu cür çatların və çökmələrin qısa müddətdə baş verməsi bina tikintisində keyfiyyət məsələlərinə şübhə yaradır.
Altımərtəbəli binada inzibati, məşq, qrim, rejissor və istirahət otaqları, eləcə də bufet fəaliyyət göstərir. Burada 1200 nəfərlik konsert zalı, 300 yerlik iclas zalı, 10 loja və 1 VIP loja mövcuddur. Filarmoniyada kitab satışı da həyata keçirilir.
Üçüncü mərtəbənin eyvanında görkəmli bəstəkarlar Üzeyir Hacıbəylinin, Fikrət Əmirovun, Qara Qarayevin, Niyazinin və Arif Məlikovun heykəlləri ucaldılıb. Ərazidə açıq havada yay konsert meydançası, baxış qülləsi, 500 avtomobil üçün yeraltı dayanacaq və ümumi sahəsi 2 min kvadratmetr olan iki korpuslu qalereya inşa edilib.
Redaksiyamız tərəfindən Gəncə Dövlət Filarmoniyasında yaranan vəziyyətlə bağlı Mədəniyyət Nazirliyinə sorğu göndərilib. Qurumdan gün ərzində cavab veriləcəyi bildirilsə də, daha sonra heç bir açıqlama təqdim edilməyib.
Görünür, nazirlik nümayəndələri də "görünən dağa bələdçiyə ehtiyac yoxdur" prinsipi ilə hərəkət etməyi üstün tutublar.
