Gəncə şəhər bulvarında aparılan təmir işlərinin uzun müddətdir başa çatdırılmaması sakinlərin narazılığına səbəb olub.
Gencexeber.az-a şikayət ünvanlayan şəhər sakinləri bildirir ki, artıq iki ilə yaxındır bulvar yararsız vəziyyətdədir və park ərazisində bərpa işləri aparılmır.
Onların sözlərinə görə, təmirə başlanandan sonra ərazi daha da dağıdılıb, lakin işlər tamamlanmayıb.
"Uşaqların və yaşlıların rahat gəzəcəyi bir məkan var idi, onu da söküb pis hala saldılar. Gün ərzində çox sayda insan bulvara gəlirdi, indi isə vəziyyət acınacaqlıdır. Əgər düzəltməyəcəkdilərsə, heç olmasa bu vəziyyətə salmazdılar," – deyə gəncəlilər narazılıqlarını bildirirlər.
Sakinlər eyni zamanda qeyd edir ki, dəfələrlə müraciət etmələrinə baxmayaraq, problem hələ də həllini tapmayıb. Onlar aidiyyəti qurumlardan məsələyə ciddi yanaşılmasını tələb edirlər.
