Gənc şahmatçı Ülviyyə Fətəliyeva olimpiadaya qatılır.
Gencexeber.az Şahmat Federasiyasına istinadən məlumat verir ki, bu gün, sentyabrın 10-u Macarıstanın paytaxtı Budapeştdə 45-ci Ümumdünya Şahmat Olimpiadasının açılış mərasimi təşkil olunacaq. Kişilərin mübarizəsində 197, qadınların yarışında isə 184 ölkənin komandası mübarizə aparacaq.
Azərbaycanı təmsil edən 5 qadın şahmatçının arasında Nizami yurdunun yetirməsi Ülviyyə Fətəliyeva da yer alır. Qadın şahmatçılardan ibarət milli komandanın kapitanı Mixail Şereşevski olimpiadayla bağlı fikirlərini paylaşıb:
“Ümumdünya Şahmat Olimpiadası gərgin yarışlardan biridir. Reqlament hər tura ciddi yanaşmağa məcbur edir. Olimpiadada dünyanın ən güclü şahmat heyətləri mübarizə aparacaq. Biz də yaxşı çıxış etmək üçün çalışacağıq”.
Qeyd edək ki, Şahmat Olimpiadası sentyabrın 23-dək davam edəcək. Yarışda ilk turun partiyaları sentyabrın 11-də keçiriləcək.
