Gəncə şəhərində su və kanalizasiya sistemlərinin modernləşdirilməsi üçün layihə hazırlanıb.
Gencexeber.az Avropa Yenidənqurma və İnkişaf Bankına (EBRD) istinadən məlumat verir ki, şəhərin su təchizatı, kanalizasiya və yağış sularının idarə olunması infrastrukturunun təkmilləşdirilməsi, həmçinin çirkab su təmizləyici qurğuların tikintisi üçün 365 milyon avro məbləğində kreditin ayrılması müzakirə ediləcək.
Layihənin ümumi dəyəri 370 milyon avrodur. Kredit bir neçə tranş üzrə ayrılacaq və beynəlxalq investisiya qrantı ilə birgə maliyyələşdiriləcək. Borcalan Azərbaycan Maliyyə Nazirliyi, benefisiar isə Dövlət Su Ehtiyatları Agentliyidir.
Proqram üzrə görüləcək işlərdən sonra Gəncə şəhəri fasiləsiz su təchizatı və kanalizasiya xidmətləri ilə tam təmin olunacaq, yağış sularının idarə olunması sistemi sayəsində daşqın riskləri azalacaq. Layihə həmçinin tullantı sularının Gəncəçay çayına axıdılmadan əvvəl təmizlənməsini təmin etməklə ətraf mühitə də faydalı təsir göstərəcək.
Kreditlə bağlı qərarın EBRD-in Direktorlar Şurasının noyabrın 6-da qəbul edilməsi gözlənilir.
