Beş nəfər sakin dələduzların toruna düşüb.
Kəpəz televiziyası məlumat verir ki, həmin şəxslərin bank kartlarından müxtəlif yollarla müəyyən məbləğdə pul vəsaitləri mənimsənilib. Zərərçəkənlərin ortaq nöqtəsi onların kart nömrələrini tanımadıqları internet saytlarına və ya xarici nömrələrə bildirmələridir.
“İnternetdə bir proqramla tanış oldum. Orada ad və soyadımı, bir də kart nömrəmi yazdım. Sonra gördüm ki, kartımdan pul çıxır”, – deyə zərərçəkənlərdən biri bildirib.
DİN-in Mətbuat Xidmətinin Gəncə regional qrupunun baş inspektoru Eşqin Qasımovun sözlərinə görə, vətəndaşlar saxta alış-veriş saytlarından ucuz adlandırılan əmtəə mallarını onlayn yollarla alarkən, oraya bank məlumatlarını daxil edirlər. Bu zaman da dələduzlar bank məlumatlarını əldə edərək, vətəndaşların hesabında olan pulu digər hesablara köçürürlər. Eşqin Qasımov sakinlərin bank məlumatlarını 3-cü şəxslərə vermələrini və əmin olmadıqları, tanımadıqları internet saytlarına bu məlumatları daxil etməmələrini tövsiyyə edib.
