Gəncə Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Fazil İbrahimovun (soyadı şərtidir) cinayət işi üzrə məhkəmə istintaqı başa çatıb.
Pravda.аz xəbər verir ki, hakim Bəhruz Müslümovun sədrliyi ilə keçirilən prosesdə hökm oxunub.
Məhkəmənin hökmü ilə ona şərti cəza verilib.
İttiham materiallarına əsasən, hadisə 12 iyun 2025-ci il tarixdə, saat 12:00 radələrində Bakı-Qazax magistral avtomobil yolunun Qazax rayonu istiqamətində, Şəmkir rayonundakı İpək Yolu qəsəbəsində baş verib.
Belə ki, Fazil İbrahimov həmin ərazidə yeznəsinə məxsus, icarə əsasında fəaliyyət göstərən mərmər-qranit sexində fəhlə kimi işlədiyi zaman bir neçə gün əvvəl həmin sexdən mərmər almış Şəmkir rayon sakini, zərərçəkmiş Cəfər Cəfərov (soyadı şərtidir) həmin obyektə gələrək aldığı mərmərlərin qüsurlu olduğunu bildirib və ödədiyi pulun geri qaytarılmasını tələb edib. Bu səbəbdən tərəflər arasında mübahisə yaranıb.
İttihama görə, mübahisə zamanı təqsirləndirilən şəxs və zərərçəkmiş şəxs qarşılıqlı şəkildə bir-birlərinin ailə üzvlərinin ünvanına təhqiredici ifadələr işlədiblər. Daha sonra Cəfər Fazilə bədən xəsarətləri yetirib. Bundan sonra zərərçəkmiş şəxs hadisə yerini tərk edib. Lakin həmin gün saat 14:00 radələrində Cəfər yenidən mərmər-qranit sexinə qayıdaraq mübahisəni davam etdirib və Fazilin bacısının ünvanına təhqiredici ifadələr işlədib. Bu zaman yaranmış gərginlik fonunda təqsirləndirilən şəxs sexin içərisindən mətbəx bıçağını götürərək Cəfərin qarnına zərbə endirib.
