5 gəncin ölümü ilə nəticələnən ağır qəzada "Lexus" markalı avtomobil idarə şəxs Azərbaycan Dövlət Aqrar Universitetinin (ADAU) tələbəsi olub.
Gencexeber.az-ın məlumatına görə, dekabrın 7-də saat 02:00 radələrində Biləsuvar rayonunun Zəhmətabad kəndi ərazisində ağır yol-nəqliyyat hadisəsi baş verib. "Lexus" markalı avtomobil idarəetmədən çıxaraq su kanalına aşıb. Qəza nəticəsində sürücü - Azərbaycan Dövlət Aqrar Universitetinin məzunu, 2003-cü il təvəllüdlü Vasif Həsənli, eləcə də qardaşı – 24 yaşlı Rusif Həsənli, əmisi oğlu – 35 yaşlı İldırım Həsənli, həmçinin 25 yaşlı Məhəmməd Məmmədli və 18 yaşlı Əliqardaş Rəsulzadə həlak olublar.
Həyatını itirən şəxslərin hamısı Zəhmətabad kənd qəbiristanlığında yan-yana dəfn edilib.
Məlumata görə, Vasif Həsənli Azərbaycan Dövlət Aqrar Universitetinin Aqronomluq fakültəsində təhsil alıb və həyatının 3 ilini Gəncədə yaşayıb. O, ADAU–EGE beynəlxalq ikili diplom proqramı çərçivəsində Türkiyənin Ege Universitetinə bütün qruplar arasında ən yüksək bal toplayaraq qəbul edilib. Bakalavr təhsilini başa vurduqdan sonra isə hərbi xidmətə yollanıb.
Sözügedən proqramla magistr təhsilini davam etdirən Vasifin Gəncə şəhərindən olan qrup yoldaşları İzmirdə mərhumun ruhuna ehsan veriblər.
