Şəmkir şəhər Cahangir Rüstəmov adına tam orta məktəbdə əsaslı təmir-tikinti işləri davam etdirilir.
Gencexeber.az-ın məlumatına görə, məktəb ölkədə ən böyük təhsil ocaqlarından biridir. Təmir işləri "Veka Qrup nömrə 1" şirkəti tərəfindən həyata keçirilir. Layihəyə əsasən, məktəb 1660 şagird yerlik olacaq və tədris üçün müasir şərait yaradılacaq.
Görülən işlər çərçivəsində məktəbin hasar işləri tam yekunlaşıb, daxili təmir işlərinin isə artıq yarısı başa çatdırılıb. Eyni zamanda, məktəbin həyətində hər biri 225 kubmetr tutuma malik iki ədəd su anbarının tikintisi tamamlanıb. Nasosxana və qazanxanalar üçün nəzərdə tutulan tikililərin inşası da bitib.
Qeyd edək ki, məktəb 1990-cı ildən fəaliyyət göstərir. Təhsil ocağının əsaslı təmiri Elm və Təhsil Nazirliyinin sifarişi ilə aparılır. Məktəbin növbəti tədris ilində istifadəyə verilməsi nəzərdə tutulur.
