Dövlət Təhlükəsizliyi Xidmətinin (DTX) korrupsiya və vəzifə cinayətləri ilə mübarizə istiqamətində apardığı əməliyyatlar davam edir. Bu dəfə hədəfdə Balakən rayon İcra Hakimiyyətinin başçısı vəzifəsindən azad edilmiş İslam Rzayev olub. İslam Rzayevin həbsi ilə icra başçılarından dəmir barmaqlıqlar arxasına düşənlərin sayı 7-ə yüksəlib.
Modern.az deputatlar arasında sorğu keçirərək, təmsil etdikləri rayonun icra başçısından şikayətlərin olub-olmadığına aydınlıq gətirmələrini istəyib.
Milli Məclisin Aqrar siyasət komitəsinin sədri, Ağcabədinin deputatı Tahir Rzayev bildirib ki, təmsil etdiyi rayonun icra başçısı insanlara qarşı mehriban və səmimidir:
"İcra başçımız mədəni insandır, onun zəngin təcrübəsi var. Münasibətlərimiz qarşılıqlıdır və bu əlbəttə ki, rayonun inkişafı, adamların rifahı üçündür. Müntəzəm olaraq görüşür, rayon əhəmiyyətli tədbirlərdə iştirak edir, şəhid ailələrinin yanında oluruq. İnsanlar əsasən ondan razıdırlar. Elə rayon başçısı yoxdur ki, ondan müəyyən şikayətlər olmasın. Bunun müxtəlif səbəbləri var. Bəzən insanlar icra başçısının səlahiyyətinə aid olmayan məsələlərə münasibət bildirir, onun həllini tələb edirlər. Bu, mümkün olan hal deyil. Bəzi köklü problemlər olur ki, başçının imkanları xaricindədir".
Cəbrayılın deputatı Ceyhun Məmmədov qeyd edib ki, icra başçılarının üzərinə çox ciddi, böyük məsuliyyət düşür:
"Cəbrayıl rayonunun icra başçısı əhali və onun qayğıları ilə, mövcud problemlərin həlli ilə məşğul olur. Aramızda konstruktiv əməkdaşlıq var. Vətəndaşların arzusu ondan ibarətdir ki, onların bütün müraciətləri həllini tapsın və yüksək qiymətləndirilsin. Həmişə buna nail olmaq mümkün deyil. Bu amil də nəzərə alınmalıdır. Həllinin tapılması mümkün olan məsələlər öz həllini tapıb. Elə məsələlər var ki, icra başçılarından asılı olmur, o zaman vətəndaşlar narazı qalırlar".
Qusarın deputatı Azər Badamov icra başçısı ilə koordinasiya olunmuş fəaliyyət göstərdiklərini deyib:
"Qusar rayonuna təyin olunmuş İcra Hakimiyyəti başçısının fəaliyyətindən çox məmnunam. Biz rayonun deputatı və icra başçısı olaraq koordinasiya olunmuş fəaliyyət göstəririk. Çünki məqsədimiz rayon sakinlərinə xidmət etməkdir. Qusar rayonunda dövlətlə vətandaş arasında etimad mühiti möhkəmlənib. Ona görə də son vaxtlar icra sturkturularından bizə olunan şikayətlər də sıfıra enib".
İmişlinin deputatı Razi Nurullayev az hallarda yazılı şikayətlər daxil olduğunu söyləyib:
"Amma xeyli məsələlər var ki, onları İcra hakimiyyəti həll etmir. Vətəndaş isə bütün problemlərin həlli üçün birinci növbədə deputat və İcra hakimiyyətinə üz tutur. Vacib məsələ odur ki, vətəndaşın müraciətinə can yandırasan, problemin həlli üçün çalışasan, düzgün yol göstərəsən".
Əziz gəncəlilər, icra başçınızın fəaliyyətindən razısınız, yoxsa narazı?
