Tovuzun avtomobil bazarında bir müddətdir ki, durğunluq yaşanır. Payızda adətən qızğın alış-verişin müşahidə edildiyi bazarda, indi gözə alıcı az dəyir.
AZƏRTAC xəbər verir ki, avtomobil bazarında əsas üstünlük sovet avtomobillərinə verilsə də, onların da qiymətinin baha olması alıcıları qane etmir. Alıcılar qiymətin həddən artıq yüksək olmasından, satıcılar isə alıcı azlığından gileylənirlər.
Kənardan avtomobil bazarında insan sayı çox görünsə də, bazarda bir qədər gəzib dolaşdıqdan sonra məlum olur ki, bu insanların əksəriyyəti elə avtomobil sahibləridir. Bazarda kifayət qədər müxtəlif markalı avtomobillərə rast gəlmək olur. Satışa çıxarılan 200-dək avtomobilin əksəriyyəti Rusiya istehsalıdır. Düzdür, bazarda digər xarici istehsal olan avtomobillər də var. Amma onlarla maraqlanan azdır.
Şəmkirdən Tovuz bazarına avtomobilini satmağa gələn İsmət Məmmədov deyir ki, 1981-ci ildə istehsal olunmuş "VAZ 2106" markalı avtomobilini 4 min manata satışa çıxarsa da, alıcı yoxdur. "3700 manat təklif etdilər, satmadım. Baha satmıram, avtomobilimin vəziyyəti yaxşıdır deyə, bu qiymətə satıram. 2-3 nəfər maraqlansa da, istədiyim məbləğdə razılaşmadıq", - deyə İ.Məmmədov bildirir.
Digər satıcı Zakir Əmiraslanov isə bazara ilk dəfədir maşın gətirib. O, xarici istehsal olan avtomobilini sata bilmədiyini vurğulayır. "Bazara "Nissan Not" gətirmişəm. 2006-cı il istehsalıdır, 100 kilometrə 4 litr yanacaq sərf edir. Maraqlanan yoxdur. Amma sovet istehsalı olan maşınların alıcısı var. Alıcılar bu avtomobillərə üstünlük verirlər. Onlar yaxşı satılır. Qiyməti müqayisə etsək, demək olar ki, xarici avtomobilləri çox ucuz deyirik. Yaşı çox olan maşınlar da var ki, xarici avtomobillərdən baha satılır, onu alırlar. Amma xərci az olan bu maşınları alan yoxdur", - deyə əlavə edir.
Alıcılar da qiymətlərin münasib olmadığını deyirlər. Onlardan biri də Arzuman İsmaylovdur: "06", ya da "07" almağa gəlmişik. Çox baha deyirlər. Üç min manata avtomobil axtarıram, normal maşın yoxdur. Bəzi maşınları da yoxlatdırırsan, çox hissəsi xarab çıxır. Mən istədiyim maşın 3500 manata idi. Amma tapa bilmirəm. Bu bölgədə əsas VAZ markalı avtomobillərə daha çox ehtiyac var", – deyə o bildirir.
Hətta bəzi alıcılar da var ki, 5 min manata istədiyi köhnə istehsal ili olan avtomobili tapa bilmir. Alıcı Eltun Mahmudov deyir: "Sovet istehsalı olan avtomobillərə baxıram. Qiymətlər cibimə uyğun deyil. Mən 5 min manata maşın almaq istəyirəm, bahadır, ala bilmirəm. Keçən illə müqayisədə, bu il bir az ucuzlaşma var. Məncə qiymətlər bir az da aşağı olsa yaxşı olar".
Nəqliyyat eksperti Eldəniz Cəfərovun fikrincə, ölkəmizdə fəaliyyət göstərən avtomobil bazarlarında alqı-satqı ötən illərlə müqayisədə bir qədər azalsa da, ümumilikdə, artım dinamikası müşahidə edilir. "Rusiya istehsalı olan avtomobillərə son vaxtlar tələbat azalıb. Bu da Çindən daha münasib qiymətə yeni avtomobillərin gətirilməsi ilə əlaqədardır. Alıcılar bu avtomobillərə daha çox üstünlük verirlər", - deyə ekspert bildirib.
E.Cəfərov onu da əlavə edib ki, hibrid avtomobillərə tətbiq olunan güzəştin müddəti 2026-cı il yanvarın 1-də bitir, həmçinin həmin dövrdən etibarən ölkəmizə idxal olunacaq köhnə, yaşı 7 ildən çox olan avtomobillərin mühərrik həcminə görə alınan aksiz vergilərinin dərəcələri də artırılır. Bu isə o deməkdir ki, gələn ildən ölkə daxilində işlənmiş avtomobillərin satış qiymətində bir qədər bahalaşma ola bilər.
