Goranboyda fermerlər narazıdırlar.
Gencexeber.az Real TV-yə istinadən məlumat verir ki, sözügedən hal rayonun Dəliməmmədli şəhərində müşahidə edilir. Fermerlərin etirazına səbəb susuzluqdur. Onların sözlərinə görə, mal-qaranı otarmaq üçün 40 hektar sahədə yonca əkiblər. Lakin su olmadığı üçün məhsul toplaya bilməyiblər.
Fermerlər bildirirlər ki, sahənin suvarılması üçün yalnız bir ədəd artezian quyusu var. Lakin dörd ildir buradan bir damcı belə su gəlmir. Aidiyyəti qurumların vətəndaşlara dəfələrlə vəd verməsinə baxmayaraq, məsələ həllini tapmayıb.
"Dörd ildir bizi aldadırlar. On gün qabaq gəldilər guya quyunu bərpa etdilər, yeni su mühərriki qoydular, üstündən iki gün keçmədi ki, artezian təmiz qurudu. Su problemimiz pik həddə çatıb. Hər dəfə şikayət edirik, “yaxşı” deyib gedirlər. Etmirik demirlər, boş vədlər verirlər", - deyə sakinlər qeyd ediblər.
Dəliməmmədli Subartezian quyularının İstismarı Sahəsinin rəisi bildirib ki, problemin səbəbi quraqlıqdır. Quyu növbəti illərdə bərpa olunacaq. Həmin vaxtadək isə alternativ üsullara əl atılacaq.
