Yüzminlərlə manat mənimsəyən şəxs məsuliyyətə cəlb edilib. Bu barədə məlumatı 14 avqust tarixində Daxili İşlər Nazirliyinin Mətbuat xidmətinə istinadən veririk.
Paytaxt ərazisində polis əməkdaşlarının həyata keçirdikləri növbəti tədbir nəticəsində 24 yaşlı Sənan Abbasov saxlanılıb. O, “Tik-Tok” sosial şəbəkəsində bank olmayan kredit təşkilatlarının adlarına oxşar səhifələr açaraq insanları aldatmaqda şübhəli bilinir.
Araşdırmalar nəticəsində bəlli olub ki, Abbasov sözügedən səhifələrə müraciət edən vətəndaşların şəxsi məlumatlarını ələ keçirərək, zərərçəkənlərin adlarına 100-600 manat aralığında mikrokreditlər rəsmiləşdirib. Daha sonra isə gənc həmin pul vəsaitlərini xarici ölkələrdən birində yaşayan yaxın qohumunun kart hesablarına köçürüb.
Qeyd edilən vəsaitlər daha sonra ölkə daxilində olan elektron pul kisələrinə göndərilərək, Gəncədə nağdlaşdırılıb. Abbasov bu yolla 200 nəfəri aldadaraq 350 min manatdan artıq maddi vəsaiti mənimsəyib.
O, törətdiyi qanunsuz əməllərdən yayınmaq məqsədi ilə ölkəni tərk etmək istəyən zaman polis əməkdaşları tərəfindən tutularaq istintaqa cəlb olunub.
