Samux rayonunda 1981-ci il təvəllüdlü Əhməd həmyerlisi İlqara (adlar şərtidir – red.) xəsarət yetirib.
Demokrat.аz xəbər verir ki, hadisə 2024-cü ilin oktyabrın 1-də rayonun kəndlərindən birində baş verib. Əhməd həmin gün saat 17 radələrində çayxananın qarşısında Ülvinin səyyar şəkildə satdığı corabı ona daha ucuz qiymətə verməsini tələb edib və rədd cavabı alıb.
Bundan sonra Əhməd Ülviyə bir daha kəndə gəlməməyi bildirib. Bu vaxt Ülvi ilə birlikdə kəndə gəlmiş qardaşı İlqarla Əhməd arasında mübahisə yaranıb. Mübahisə zamanı Əhməd İlqarın üzünə başı ilə vurub.
Hadisəni törədən Əhmədin barəsində Cinayət Məcəlləsinin 221.1-ci (xuliqanlıq, yəni ictimai qaydanı kobud surətdə pozan, cəmiyyətə açıqca hörmətsizlik ifadə edən, şəxslər üzərində zor tətbiq olunması ilə və ya belə zorun tətbiq edilməsi hədəsi ilə, habelə özgənin əmlakının məhv edilməsi, yaxud zədələnməsi ilə müşayiət edilən qərəzli hərəkətlər) maddəsi ilə ittiham elan edilib.
İş üzrə ifadə verən Əhməd ona elan olunmuş ittiham üzrə özünü təqsirli bilib.
Bu cinayət işinə Samux Rayon Məhkəməsində baxılıb. Məhkəmənin hökmü ilə Əhməd 2 ay 28 gün azadlıqdan məhrum edilib.
