Məsuliyyətsiz sakinlərin davranışı Gəncə şəhərinin ən böyük yaşayış massivlərindən biri olan Cavadxan qəsəbəsinin bir hissəsini sözün əsl mənasında zibil poliqonuna çevirib.
Gencexeber.az bildirir ki, ərazidə kifayət qədər konteynerlər mövcud olsa da, hələ də qəsəbədə yaşayan bir qrup sakin məişət və digər tullantıları hara gəldi atmaqla antisanitar vəziyyət yaradırlar.
Gəncə Şəhər İcra Hakimiyyəti Mənzil Kommunal Təsərrüfatı İstehsalat Birliyinin (MKTİB) Ərazi Xidmət Sahələri əməkdaşlarının iştirakı və qurumun xüsusi texnikaları vasitəsilə bu gün sözügedən qəsəbədə təmizlik işləri aparılıb. Aksiya çərçivəsində ərazilərdə yığılıb qalan məişət və digər tullantılardan ibarət qalıqlar bir yerə yığılaraq daşınması təmin edilib. Məişət tullantılarının atılması üçün nəzərdə tutulan müxtəlif tutumlu konteynerlər boşaldılıb, ətrafları təmizlənib. MKTİB-nin əməkdaşları tərəfindən qəsəbə sakinləri ilə profilaktik söhbətlər aparılıb, onlara məişət tullantılarının hara gəldi deyil, təyin olunan yerlərə atmaları tövsiyə olunub. Bu kimi hallara təkrar yol verənlər barəsində isə inzibati qaydada tədbirlərin görüləcəyi bildirilib.
