Gəncədə əhalinin gündəlik məişət tullantılarının atılması üçün nəzərdə tutulan müxtəlif tutumlu konteynerlər və zibil qutuları bəzi vətəndaşlar tərəfindən zədələnir və yaxud yandırılır.
Bu barədə Gencexeber.az-a Gəncə şəhər Mənzil Kommunal Təsərrüfatı İstehsalat Birliyi (MKTİB) tərəfindən bir neçə gün öncə şəhərin Zülfü Hacıyev küçəsində yandırılaraq məhv edilən zibil konteynerləri ilə bağlı açıqlama verilib.
Əlavə olunub ki, əksər hallarda siqaret kötüklərinin zibil qablarına atılması hallarıda yanğına səbəb olur. Dəmir və plastik materialdan hazırlanan konteynerlər isə zibillə birlikdə yandırıldığı təqdirdə tamamilə yararsız hala düşür.
"Uzun müddət istifadəyə yararlı olan konteynerlərin vətəndaş məsuliyyətsizliyi nəticəsində yandırılması birmənalı olaraq yolverilməzdir. Bu il ərzində Gəncə şəhər ərazisində mövcud olan konteymerlərin 30 faizi vətəndaş məsuliyyətsizliyi nəticəsində zədələnib və ya yandırılıb. Zədələnən 150 ədəd dəmir konteyner yenilənib və ya bərpa olunub, 10 ədəd plastik konteyner isə yandırılma nəticəsində əriyərək yararsız hala düşüb", – MKTİB tərəfindən bildirilib.
Həmçinin qeyd olunub ki, ümumiyyətlə şəhərin müxtəlif ərazilərində zibil qutularının yandırılması həm şəhərin ekoloji tarazlığına mənfi təsir göstərir, həm də sakinlərin gündəlik istifadəsində olan tutumların yararsız hala düşməsinə gətirib çıxarır.
Gəncə şəhər Mənzil Kommunal Təsərrüfatı İstehsalat Birliyi əhali və qeyri əhali qrupuna müraciət edərək bildirib ki, yeni və mövcud konteynerlərin daxilində, həmçinin ətrafında zibil yandırmasınlar. Bu kimi neqativ hallar ətraf ərazinin tüstü ilə çirkləndirilərək vətəndaşların haqlı narazılığına səbəb olmaqla yanaşı, həmçinin konteynerlərin zədələnərək vaxtından əvvəl sıradan çıxmasına gətirib çıxarır.
Qeyd edilib ki, bu kimi hallara yol verən vətəndaşlar aşkar olunaraq inzibati qaydada məsuliyyətə cəlb olunacaqlar.
