Hər il 18 sentyabr Azərbaycanda “Milli Musiqi Günü” kimi qeyd olunur. Bu bayram Üzeyir Hacıbəyovun doğum günü ilə bağlıdır. 1995-ci ildən, bəstəkarın anadan olmasının 110 illik yubileyi ilə əlaqədar həmin günün “Milli Musiqi Günü” kimi qeyd olunmasına başlanıb.
Üzeyir Hacıbəyovun ad gününün bayram kimi qeyd edilməsi ənənəsinin əsasını Maestro Niyazi qoyub. Bəstəkar və dirijor Niyazi, əmisi Üzeyir bəyin vəfatından sonra hər il bu günü qeyri-rəsmi qeyd edərmiş. Hər il 18 sentyabr tarixində Azərbaycan Dövlət Konservatoriyasının (indiki Üzeyir Hacıbəyov adına Bakı Musiqi Akademiyası) önündə minlərlə insan toplaşırdı. Burada Üzeyir Hacıbəyovun adını daşıyan Azərbaycan Dövlət Simfonik Orkestri Niyazinin rəhbərliyi ilə bəstəkarın əsərlərini ifa edərdi.
XX əsrin 90-cı illərinin əvvəllərində Azərbaycanda yaşanan siyasi hadisələrə görə bu ənənə bir müddət unuduldu. Lakin ümummilli lider Heydər Əliyevin fərmanı ilə 1995-ci ildən bu bayram rəsmi şəkildə bərpa olundu.
Milli Musiqi Günü ilə əlaqədar hər il sentyabr ayında Üzeyir Hacıbəyov Beynəlxalq musiqi festivalı və başqa tədbirlər keçirilir.
Üzeyir bəy Əbdülhüseyn oğlu Hacıbəyov 18 sentyabr 1885-ci ildə Ağcabədidə anadan olub. O, bəstəkar, musiqişünas alim, publisist, dramaturq, pedaqoq və ictimai xadim, müasir Azərbaycan peşəkar musiqi sənətinin və milli operasının banisidir. Üzeyir bəy 1908-ci ilin yanvarında tamaşaya qoyulmuş ilk Azərbaycan operası “Leyli və Məcnun”un müəllifidir. O, həm də Azərbaycanda musiqili komediya janrının yaradıcısıdır.
Üzeyir Hacıbəyov 23 noyabr 1948-ci ildə 63 yaşında ürək çatışmazlığından Bakıda vəfat edib. Bəstəkar I Fəxri Xiyabanda dəfn olunub
