Gəncədə yararsız halda olan məktəblər təmir olunur. Bu haqda 19 yanvar tarixində Kəpəz televiziyasına istinadən məlumat veririk.
Şəhərdə mərhələli şəkildə 5 yeni məktəbin inşası nəzərdə tutulub. Bildirilir ki, yeni tədris ilinə kimi 2 məktəb təmir və tikintidən sonra müəllimlərin və şagirdlərin istifadəsində olacaq.
Onlardan biri 11 nömrəli məktəbdir. Burada ötən ilin dekabrında yenidənqurma işlərinə başlanılıb. Hazırda 4 mərtəbədən ibarət bina, idman və akt zallarında suvağa hazırlıq işləri aparılır. Məktəb 960 şagird yerlik, 40 sinif otağı və yardımçı kabinetlərdən ibarət olacaq. Bundan başqa, həyətdə əlavə idman meydançaları salınacaq. 2 ədəd 100 və 150 kubluq su hovuzu inşa ediləcək.
Vətən müharibəsi zamanı zərər görən 29 nömrəli məktəb üçün isə yeni bina tikilir. Təhsil ocağı 3 mərtəbə, 4 korpus və 960 yerlik olacaq. Hazırda binanın üçüncü mərtəbəsində hörgü işləri gedir. Məktəbdə idman meydançası salınacaq, su hovuzu inşa ediləcək və istilik sistemi quraşdırılacaq.
Həm 11, həm də 29 nömrəli məktəblərin bilik günündə istifadəyə verilməsi nəzərdə tutulur. Bununla da daha 2 minə yaxın şagirdin keyfiyyətli təhsil almaları mümkün olacaq.
Təmirsiz məktəblərin qalmaması üçün fəaliyyət planı hazırlanıb. Sadalanan bu iki məktəblə yanaşı, daha 5 təhsil ocağının təmir-tikintisi ilə məsələnin həlli hədəflənib.
