Gəncədə "BakuBus" MMC-yə məxsus yeni nəsil "Euro-6" standartlı avtobuslarda bəzi sərnişinlərin davranışı narazılıq doğurur.
Gencexeber.az-a müraciət edən şəhər sakini bildirib ki, 11 nömrəli marşrut xəttində hərəkət edən avtobusda səliqəsizliyə yol verilib və o, digər avtobuslarda da bu hallarla qarşılaşıb. Onun sözlərinə görə, bəzi sərnişinlər avtobusda tum çırtlayaraq qabıqlarını yerə atır, həmçinin digər tullantılarla nəqliyyat vasitəsini çirkləndirir.
"Bu qədər müasir, rahat və təhlükəsiz avtobuslar şəhərimizə verilib. Ailələr, uşaqlar, yaşlılar bu nəqliyyatdan istifadə edir. Tum çırtlayıb yerə atmaq nə deməkdir? Bu, həm hörmətsizlikdir, həm də ictimai mühitə ziyan vurmaqdır," – şikayətçi bildirib.
Sakin qeyd edib ki, avtobuslarda müşahidə kameraları mövcuddur və ictimai nəqliyyata qəsdən ziyan vuran şəxslərin qanunvericiliyə uyğun olaraq cərimələnməsi üçün şirkət tərəfindən tədbir görülməsi vacibdir.
"Özünü "qəhrəman" sayan insanlar bir dəfə qanun qarşısında məsuliyyətə cəlb olunsalar, bir daha belə hərəkətlər etməzlər. Zibil atmaq nə avtobusda, nə də şəhərin başqa bir yerində yolverilməzdir," – sakin əlavə edib.
