Xəbər verdiyimiz kimi, bu gün saat 13:30 radələrində "BakuBus" MMC-nin istismarında olan, Gəncə şəhərində 4 nömrəli müntəzəm marşrut xətti üzrə hərəkət edən avtobusların birində, Nəriman Nərimanov prospekti 636 ünvanında sürücü ilə sərnişin arasında insident baş verib.
Sözügedən məsələ ilə bağlı Gencexeber.az-a "BakuBus" MMC-nin məbuat xidmətindən bildirilib ki, hadisə ilə bağlı operativ araşdırma aparılıb.
"Müəyyən edilib ki, sürücü tərəfindən sərnişindaşıma qaydalarının pozulması halı qeydə alınıb. Baş vermiş hal ilə əlaqədar sürücü barəsində intizam tənbehi tədbirinin tətbiqi nəzərdə tutulub. Nəzərinizə çatdırırıq ki, "BakuBus" MMC sərnişinlərin təhlükəsizliyi və xidmət keyfiyyətini daim prioritet hesab edir. Bu kimi halların qarşısını almaq məqsədilə davamlı olaraq sürücülərlə profilaktik işlər aparılır, intizam və məsuliyyət mövzularında mütəmadi təlimlər təşkil olunur", – "BakuBus" MMC tərəfindən bildirlib.
Sərnişindaşıma şirkəti tərəfindən sərnişinlərdən üzr istənilib: "Yaşanan narahatlığa görə sərnişinlərimizdən üzr istəyir, həmçinin gələcəkdə xidmət keyfiyyətinin daha da artırılması üçün sıx əməkdaşlığa dəvət edirik".
